Yəməndə prezident seçkisinin ilkin nəticələri açıqlanıb
Yəməndə prezident seçkisi başa çatıb. Seçkinin ilkin nəticələrinə görə, seçicilərin böyük əksəriyyəti vitse-prezident Abid Rəbbu Mənsura səs verib.
Səslərin hesablanması prosesi yekunlaşdıqdan sonra Əli Abdulla Salehin 33 illik hakimiyyəti sona çata bilər.
Ölkənin seçki komissiyası səsvermə zamanı yüksək seçici fəallığının qeydə alındığını və seçki məntəqələrinin böyük insan axının öhdəsindən gələ bilmək üçün reqlamentdə nəzərdə tutulan səsvermə vaxtının bir neçə saat uzadıldığını bildirib.
Seçki rəsmilərinin nikbin bəyanatlarına baxmayaraq, səsvermə günü də qansız ötüşməyib.
Ölkənin cənubunda seçki məntəqələrinə edilən hücum zamanı azı 5 nəfərin öldürüldüyü xəbər verilir.
Seçki Komissiyası ixtilaf və qarışıqlıq səbəbilə 301 seçki bölgəsindən 9-da səsvermənin təxirə salındığını bəyan edib.
Bundan başqa, cənub əyalətlərində naməlum silahlıların 44 seçki qutusunu ələ keçirdiyi bildirilir.
islamazeri.az